ASPENSI Baris Gawé Bareng Sareng UNSUR

1
121

Ku alatan nerbitkeun jurnal-jurnal ilmiah anu diperyogikeun ku sawatara paguron luhur, ASPENSI (Asosiasi Sarjana Pendidikan Sejarah Indonesia) di Bandung baris ngayakeun gawé bareng deui sareng UNSUR (Universitas Suryakancana) di Cianjur, Jawa Barat. Dupi jurnal ilmiah anu baris dikokolakeun sasarengan téh nyaéta ATIKAN: Jurnal Kajian Pendidikan.

Dékan FKIP (Fakultas Keguruan dan Ilmu Pendidikan) UNSUR, Dr. H. Iyép Chandra, ngadugikeun yén ieu rencana téh insya Allah badé dingawitan ti édisi Juni 2012 dugi ka édisi Désémber 2014, janten salami tilu taun, dugi ka ieu jurnal ATIKAN téh tiasa di akreditasi boh ku Kementerian Pendidikan dan Kebudayaan di Indonesia atanapi ku lembaga sanésna di mancanagara.

“Tangtos UNSUR gaduh visi ka payun, kumaha supados ieu paguron téh tiasa nanjung ku alatan seueur dosén-dosénna anu nyerat hasil panalungtikan tur diterbitkeun dina jurnal ilmiah anu gaduh wibawa akademik sareng tiasa diaksés ku saha baé di sawatara dunya”, saur Iyep anu ogé mangrupakeun Alumni ti IKIP (Institut Keguruan dan Ilmu Pendidikan) Bandung.

Sagédéngeun ti éta, Bendahara Umum ASPENSI, Farida Sarimaya, ogé nandeskeun yén gawé bareng dina hal penerbitan jurnal ilmiah ieu sanes pasualan anyar kanggé ASPENSI mah, margi sateuacanna ogé ASPENSI tos gaduh pangalaman sareng UMP (Universitas Muhammadiyah Purwokerto) di Jawa Tengah dina nerbitkeun EDUCARE: International Journal for Educational Studies; sareng UVRI (Universitas Veteran Republik Indonesia) di Makassar, Sulawesi Selatan, dina nerbitkeun TAWARIKH: International Journal for Historical Studies.

“Malihan mah SOSIOHUMANIKA: Jurnal Pendidikan Sains Sosial dan Kemanusiaan kangtos gawé bareng ogé sareng UMS (Universiti Malaysia Sabah) di Kota Kinabalu, Malaysia; sareng UNIPA (Universitas PGRI Adibuana) di Surabaya, Jawa Timur, Indonesia”, saur Farida anu ogé mangrupakeun dosén di Jurusan Pendidikan Sejarah UPI (Universitas Pendidikan Indonesia) di Bandung.

Ditaros perkawis bahasa anu digunakeun dina jurnal ATIKAN, Farida nétélakeun yén ieu jurnal téh di rarancang mémang kanggo aoskeuneun para guru, dosen, sareng akademisi di Asia Tenggara. Kumargi kitu, Bahasa Indonesia, Bahasa Melayu, sareng Bahasa Inggeris baris digunakeun dina ieu jurnal.

“Tapi rupina mah teu acan tiasa nganggo Bahasa Sunda, sok sanaos ieu bahasa téh digunakeun ku langkung ti 40 juta jalma di Tatar Sunda; langkung seueur ti bahasa Melayu di Malaysia, Singapura, Brunei Darussalam, Tailand sareng Philipina Selatan anu kirang-langkung 30 juta pinuturna”, saur Farida nandeskeun.

“Manawi kapayun mah urang ikhtiaran kanggo ngabuktikeun yén Bahasa Sunda téh sanés baé bahasa indung sareng bahasa rasa, tapi ogé tiasa janten bahasa ilmiah”, Farida mungkas carita. [MAS]

SHARE

1 COMMENT

  1. Alus lur, ASPENSI sing nanjung. Tapi tong hilap ka purwadaksina. Bahasa sareng budaya Sunda kedah dimumule ku urang sadaya. Jurnal ATIKAN oge sae pisan. Sampurasun.

LEAVE A REPLY

Please enter your comment!
Please enter your name here